Andrea Jacobsen hefur verið skráð til leiks á heimsmeistaramóti kvenna í handknattleik og verður þar af leiðandi gjaldgeng í leikinn við Úrúgvæ í dag. HSÍ tilkynnti þetta fyrir stundu en Andrea meiddist á ökkla fyrir þremur vikum og hefur síðan verið í stöðugri endurhæfingu sem skilað hefur þeim árangri að hún er talin vera klár í slaginn með landsliðinu á HM.
Leikur Íslands hefst klukkan 14.30. Um er að ræða úrslitaleik í riðlinum, en sigri Ísland tryggir þær sig inn í milliriðil. Hvaða 16 leikmenn taka þátt í leiknum verður tilkynnt þegar nær dregur viðureigninni.
Með skráningu Andreu til leiks á HM eru 18 leikmenn gjaldgengir með íslenska landsliðinu á mótinu og ljóst að tvær munu sitja yfir í leiknum í gegn Úrúgvæ. Aðeins má tefla fram 16 leikmönnum í hverjum leik.
Andrea er 27 ára gömul og hefur leikið 66 landsleiki og skorað í þeim 116 mörk. Hún tók þátt í HM 2023 og EM 2024. Frá sumrinu 2024 hefur Andrea leikið með þýska liðinu HSG Blomberg-Lippe.
A-landslið kvenna – fréttasíða.
HM kvenna ”25 – dagskrá, riðlakeppni, úrslit
Landslið Íslands á HM kvenna 2025
