„Við vorum grimmar frá fyrstu mínútu eins og nauðsynlegt er í svona leikjum,“ sagði Elín Rósa Magnúsdóttir landsliðskona í handknattleik eftir sigurinn á Úrúgvæ í dag, 33:19. Sigurinn innsiglaði íslenska landsliðinu sæti í milliriðlakeppni HM sem hefst á þriðjudaginn í Dortmund.
„Við afgreiddum þetta vel í gegnum 60 mínútur þótt það kæmi upp smá kæruleysi á köflum,“ sagði Elín Rósa sem gat ekki leynt gleði sinni.
„Það er svo gott að vera komin í milliriðla. Við erum ótrúlega spenntar fyrir leikjunum sem eru framundan [Færeyjar, Svartfjallaland, Spánn – innsk. blm] í stað þess að fara í forsetabikarinn. Það munur miklu fyrir okkur að fá hörkuleiki á svona móti. Andstæðingarnir verða lið sem eru nærri okkur að styrkleika. Þetta verður gott fyrir okkur að fá fleiri leiki eins og gegn Þýskalandi og Serbíu. Þannig getum við tekið framförum,“ sagði Elín Rósa sem var með á HM fyrir tveimur árum þegar íslenska liðið missti naumlega af sæti í milliriðlum og fór þess í stað í keppni um forsetabikarinn sem gekk að óskum þótt andstæðingarnir væru flestir slakir.
Lengra viðtal við Elínu Rósu er að finna í myndskeiði hér fyrir ofan.
A-landslið kvenna – fréttasíða.
HM kvenna ”25 – dagskrá, riðlakeppni, úrslit
Landslið Íslands á HM kvenna 2025
Öruggur sigur á Úrúgvæ – sæti í milliriðlum – fyrsti leikur á þriðjudag
