Færeyingar unnu öruggan sigur á landsliði Paragvæ í síðasta leik sínum í D-riðli heimsmeistaramóts kvenna í handknattleik í dag, 36:25. Leikið var í Tríer. Færeyska liðið er þar með gulltryggt í milliriðlakeppni heimsmeistaramótsins í fyrsta sinn en þetta er einnig frumraun færeysks kvennalandsliðsins á heimsmeistaramóti. Ásamt Færeyingum halda Svartfellingar og Spánverjar áfram keppni og mæta Íslandi, Serbíu og Þýskalandi í milliriðli í Dortmund á þriðjudag, fimmtudag og laugardag.
Sigurinn var aldrei í hættu hjá færeyska liðinu í dag. Paragvæar náðu aðeins að hanga með í fyrri hálfleik. Staðan var 16:13 í hálfleik. Í síðari hálfleik herti færeyska liðið tökin og vann með 11 marka mun þegar upp var staðið.
Nokkrar af helstu leikmönnum færeyska liðsins léku ekki nema hluta leiksins til spara kraftana fyrir milliriðlakeppnina.
Maria Nölsoy skoraði sex mörk og var markahæst. Elisabeth Weyhe var næst með fimm mörk. Súna Hansen, Marianna Eystberg og Liv Poulsen skoruðu fjögur mörk hver.
Færeyingar unnu sögulegan sigur á Spánverjum á föstudaginn.
Færeyingar unnu sögulegan sigur í Tríer
