Íslenska landsliðið mætir Svartfjallalandi í fyrstu umferð milliriðlakeppni heimsmeistaramóts kvenna í handknattleik í Westfalenhallen í Dortmund á þriðjudaginn. Eftir fimm marka tap fyrir Spáni í dag hafnaði Svartfjallalandi í þriðja sæti D-riðils með slökustu markatöluna í innbyrðis leikjum Spánverja, Svartfellinga og Færeyinga.
Á fimmtudaginn leikur íslenska landsliðið við Spán og loks gegn Færeyingum á laugardaginn.
Leiktímar hafa ekki verið ákveðnir ennþá en verða væntanlega staðfestir þegar líður á kvöldið.
Leikjadagskrá:
Þriðjudagur 2. des.: Ísland - Svartfjallaland.
Fimmtudagur 4. des.: Ísland - Spánn.
Laugardagur 6. des.: Ísland - Færeyjar.
Auk Svartfjallalands, Spánar, Færeyja og Íslands taka Þjóðverjar og Serbar einnig sæti í riðlinum en viðureignir Íslands við Þýskaland og Serbíu flytjast með í milliriðil. Tvö efstu lið milliriðilsins komast áfram í átta liða úrslit. Ísland verður eina liðið af sex sem hefur keppni í milliriðli án stiga.
Spánn vann Svartfjallaland með fimm mörkum, 31:26, og hafnar í efsta sæti D-riðils með fjögur stig og plús þrjú mörk í innbyrðis markatölu í leikjum við Færeyinga og Svartfellinga. Færeyingar eru með eitt mark í mínus úr leikjum sínum við Svartfellinga og Spánverja og Svartfellingar með mínus tvö mörk og fjögur stig eins og Færeyingar.
