Andrea Jacobsen verður ekki með íslenska landsliðinu á morgun þegar liðið mætir Svartfellingum í fyrstu umferð milliriðlakeppni heimsmeistaramótsins. Arnar Pétursson landsliðsþjálfari staðfesti þetta við handbolta.is í Dortmund í kvöld. Arnar sagði að því miður hefðu æfingar sem Andrea gekkst undir í dag ekki komið vel út og því væri útilokað að tefla henni fram á morgun. Andrea sleit liðband í ökkla snemma í nóvember.
Von betri í gær
Andrea var skrifuð inn sem þátttakandi HM í gær þegar vonir stóðu til þess að hún væri á góðri leið með að geta leikið með landsliðinu á HM. Framhaldið er óljóst að sögn Arnars en alveg víst að hún tekur ekki þátt í leiknum við Svartfellinga í Westfalenhallen klukkan 17 á morgun.
„Við testuðum Andreu í dag, eftir að hún hefur verið að stíga framfaraskref síðustu daga, og gerðum okkur vonir um að hún væri við það að verða góð. Því miður reyndist það ekki vera. Niðurstaðan er bakslag. Hún hvílir á morgun,“ sagði Arnar í samtali við handbolta.is.
Staðan tekin á morgun
„Við sjáum til hvernig staðan á henni verður í fyrramálið eftir álagið sem hún var sett undir í dag. Þá tökum við stöðuna. Auðvitað vonum við að hún jafni, taki skref fram á við næstu daga og geti verið eitthvað með okkur,“ sagði Arnar Pétursson landsliðsþjálfari í handknattleik kvenna í viðtali við handbolta.is.
