Danska landsliðið leikur ýmist í svörtum eða rauðum stuttbuxum á heimsmeistaramótinu en þeim hvítu hefur verið lagt að beiðni leikmanna þótt rauðar treyjur við hvítar buxur hafi fram til þess verið „hinn eini sanni landsliðsbúningur“ Dana. Í kvöld gengur danska landsliðið svo langt að leik í svörtum treyjum við svörtu buxurnar þegar danska landsliðið mætir Sviss.
Sviss er talið vera heimalið í leiknum í kvöld og fær þar af leiðandi að leika í sínum rauðu treyjum. Í stað þess að leika í hvítum treyjum við svartar buxur verða leikmenn danska landsliðsins í svörtum búningi í kvöld.
Að sögn danskra fjölmiðla leikur danska landsliðið aftur í svörtum búningum gegn Ungverjum á sunnudaginn.
Leikmenn fengu samþykkt að hvítum stuttbuxum verði lagt, a.m.k. um stundarsakir en eins og kom fram á handbolti.is í haust og aftur á dögunum þá hafa leikmenn landsliða Danmerkur, Svíþjóðar og Noregs farið þess á leit við handknattleikssambönd sín að hvítar, eða mjög ljósar stuttbuxur, heyri sögunni til í kvennahandknattleik.
