Svíar unnu Suður-Kóreu örugglega í annarri umferð milliriðlakeppninnar á heimsmeistaramóti kvenna í handknattleik í Rotterdam í kvöld, 32:27. Þrátt fyrir sigurinn situr sænska landsliðið eftir með sárt ennið og kemst ekki í átta liða úrslit eins og stefnt var að. Svíar höfnuðu í fjórða sæti á HM fyrir tveimur árum.
Eftir að Brasilía vann Angóla, 32:26, fyrr í dag varð ljóst að sænska landsliðið átti ekki lengur möguleika á að komast upp fyrir brasilíska liðið að stigum. Þau geta í besta lagi orðið jöfn að stigum eftir síðustu umferðina á sunnudaginn. Verði sú raunin fer brasilíska liðið áfram í átta liða úrslit ásamt Noregi úr milliriðli eitt.
Niðurstaðan er Svíum mikil vonbrigði. Hefur um fátt verið rætt síðustu daga en að hitna sé farið undir landsliðsþjálfaranum Tomas Axnér sem ráði ekki við að þjálfa félagslið samhliða þjálfun landsliðsins. Axnér hefur undanfarið hálft annað ár þjálfað Esbjerg í Danmörku samhliða starfi sínu sem landsliðsþjálfari. Margir draga þá ályktun að hann ráði ekki við tvö störf á sama tíma.
