Þorvaldur Tryggvason, línu- og varnarmaðurinn sterki hjá Aftureldingu, sneri sig á hægri ökkla á síðustu mínútum viðureignar KA og Aftureldingar í KA-heimilinu í gærkvöld. Hafði hann þá átt stórleik í vörn Mosfellinga.
„Meiðsli Þorvaldar eru vonandi ekkert alvarleg en maður veit svo sem aldrei fyrir víst með ökklatognanir. Sérstaklega þegar stutt er á milli leikja,“ sagði Stefán Árnason þjálfari Aftureldingar við handbolta.is eftir viðureignina í KA-heimilinu.
„Við sjáum betur hvað setur á næstu dögum,“ bætti Stefán við en liðsmenn hans fóru suður með bæði stigin úr KA-heimilinu, 28:22, og eru aðeins stigi á eftir Haukum og Val í þriðja sæti Olísdeildar.
Fram undan eru tveir leikir hjá Aftureldingu fyrir jólaleyfi; gegn ÍR í Olísdeildinni á mánudagskvöld í Myntkaup-höllinni að Varmá og afar mikilvægur leikur við FH í átta liða úrslitum bikarkeppni HSÍ á föstudaginn eftir viku.
Aftureldingarmenn fóru illa með KA
Olísdeildir – næstu leikir og staðan.
