Stefnt á úrslitakeppni í Frakklandi

Franska handknattleikssambandið hefur í hyggju að taka upp úrslitakeppni um franska meistaratitilinn í handknattleik karla. Gangi áætlanir eftir verður fyrsta úrslitakeppnin vorið 2027.

Átta efstu lið leika þá hefðbundna úrslitakeppni eins og m.a. er þekkt hér á landi. Frá þessu greinir franska íþróttablaðið L’Equipe.

Þetta þykja nokkur tíðindi vegna þess að í 42 ár, síðan böndum var komið á deildarkeppnina í Frakklandi og leikið í einni deild með 16 liðum, hefur það lið sem efst hefur orðið að loknum 30 umferðum orðið franskur meistari.

Afar skiptar skoðanir eru um þá breytingu að taka upp úrslitakeppni.

Umspilskeppni á milli efstu liða næstefstu deildar verður áfram með óbreyttu sniði.