Leikið verður í tveimur efstu deildum karla í Þýskalandi á milli jóla og nýárs og einnig verður þá þráðurinn tekinn upp í efstu deild kvenna eftir hlé síðan fyrir heimsmeistaramót.
Frank Bohmann framkvæmdastjóri þýsku deildarkeppninnar í karlaflokki segir að nú verði leikið í síðasta sinn, a.m.k. í bili milli jóla og nýárs. Að ári liðnu er stefnt á að hlé verði gert á keppni fyrir jól eins og gert var 2023 þegar EM karla var haldið í janúar 2024 í Þýskalandi. HM karla janúar 2027 verður leikið í Frakklandi og Þýskalandi.
Mikilvægar tekjur
Bohmann segir að eins mikið og leikmenn vilji vera í fríi á milli hátíða þá skipti leikirnir sem þá fara fram, og eins viðureignirnar 23. desember, miklu máli fyrir félagsliðin. Almenningur sé yfirleitt í fríi og fyrir vikið og nær undantekningalaust uppselt á alla leiki efstu deildar karla á Þorláksmessu og á dögunum á milli jóla og nýárs. Þess vegna hafi leikirnir mikið fjárhagslegt vægi og skipti félögin sem hafa leikmennina á launaskrá töluverðu máli. Þess vegna sé ekki almennur hljómgrunnur hjá félögunum að hætta alveg leikjum á síðustu dögum ársins þótt gerðar séu undantekningar eins t.d. verður gert að ári liðnu.
