Annar af tveimur markvörðum færeyska EM-hópsins í handknattleik karla, Aleksandar Lacok, varð að draga sig út úr landsliðinu rétt fyrir jól þegar hann meiddist á hné með félagsliði sínu, TSV St. Otmar St. Gallen í Sviss.
Í stað Lacok hefur Tórður Skorheim Guttesen markvörður Kyndils verið kallaður inn í færeyska hópinn.
Það er nokkuð áfall fyrir færeyska liðið að missa Lacok úr hóp sínum. Hann er efnilegur markvörður og var aðalmarkvörður 21 árs landsliðs Færeyinga sem vann bronsverðlaun á heimsmeistaramóti 19 ára í Póllandi í júní. Lacok gekk til liðs við TSV St. Otmar Handball St. Gallen í sumar til þess að búa sig betur undir átökin á Evrópumóti landsliða.
Ljóst er að mikið mun mæða á Pauli Jacobsen, markverði færeyska landsliðsins, á EM en hann er töluvert reynslumeiri en Guttesen sem valinn var í stað Lacok.
Vona það besta með Elias
Nokkur spenna er í Færeyjum vegna axlarmeiðsla fremsta handknattleiksmanns þjóðarinnar, Elias Ellefsen á Skipagøtu. Hann meiddist á öxl í leik með THW Kiel á laugardaginn gegn Hannover-Burgdorf. Elias var ekki með Kiel á Þorláksmessukvöld gegn SC Magdeburg. Ef marka má fréttir frá Þýskalandi í dag er ekki reiknað með honum í liði THW Kiel sem mætir HC Erlangen á morgun, föstudag.
