- Auglýsing -
Elín Klara Þorkelsdóttir og liðsfélagar í IK Sävehof halda fast í efsta sæti sænsku úrvalsdeildarinnar í handknattleik. Þær undirstrikuðu það með öruggum sigri á VästeråsIrsta HF, 30:27, á heimavelli í dag. Eftir jafna stöðu í hálfleik, 15:15, tók Sävehof-liðið yfirhöndina í síðari hálfleik.
Elín Klara skoraði fjögur mörk, ekkert þeirra úr vítaköstum, auk þess að gefa þrjár stoðsendingar.
IK Sävehof hefur unnið níu af fyrstu 10 leikjum sínum á keppnistímabilinu og er með 18 stig. Önnereds hefur 16 stig og H65 Höör með 14 stig eins og meistarar síðustu leiktíðar, Skara HF.
Viðureign IK Sävehof og VästeråsIrsta HF var sú eina í úrvalsdeild kvenna í dag. Ellefta umferð deildarinnar verður leikin 29. og 30. desember.
- Auglýsing -
