Endijs Kušners var á dögunum valinn handknattleiksmaður ársins hjá Herði á Ísafirði. Á árinu sem brátt er að baki hefur Endijs leikið með landsliði Lettlands, meistaraflokki Harðar og jafnframt lagt sig fram sem leikmaður Harðar. Endijs hefur einnig verið ómetanlegur stuðningur fyrir nýja leikmenn sem flytja til Ísafjarðar og hjálpað þeim að aðlagast lífinu á Íslandi, segir í tilkynningu Harðar.
Endijs gekk til liðs við Hörð fyrir fimm árum aðeins 16 ára gamall og hefur síðan vaxið í einn reynslumesta leikmann félagsins. Hann hefur leikið með Herði í öllum þremur deildum íslensks handbolta.
Hermann Alexander Hákonarson var valinn efnilegasti leikmaður Harðar. Hann er 16 ára gamall. Hermann Alexander var valinn í U16 landslið Íslands á árinu. Hann hefur sýnt stöðugar framfarir og mikla alúð í starfi sínu. Hann hefur einnig verið lykilmaður í 3. flokki, sem hefur tekið stór skref fram á við á síðasta tímabili.
„Hermann er duglegur, jákvæður og hvetjandi leikmaður sem hefur góð áhrif á hópinn. Hann er frábær fyrirmynd fyrir liðsfélaga sína, bæði innan og utan vallar, og viðhorf hans, metnaður og þróun endurspegla þau gildi sem Hörður stendur fyrir,“ segir í tilkynningu Harðar.
