Óðinn Þór Ríkharðsson leikur með Kadetten Schaffhausen til úrslita í bikarkeppninni í Sviss á morgun eftir sigur á TSV St. Otmar St. Gallen, 28:26, í hörkuundanúrslitaleik í kvöld. Kadetten mætir Pfadi Winterthur í úrslitaleiknum á morgun. Winterhur lagði BSV Stans, 34:25, í fyrri viðureign undanúrslita í Pilatus Arena í Luzern.
Óðinn Þór var næst markahæstur hjá Kadetten í undanúrslitaleiknum í kvöld með sex mörk, fjögur þeirra skoraði hann úr vítaköstum.
Leikmenn TSV St. Otmar St. Gallen voru með frumkvæðið í 45 mínútur í viðureigninni og var m.a. marki yfir, 16:15, í hálfleik. Reynt lið Kadetten náði að komast yfir þegar á leið síðari hálfleik og halda forystunni þrátt fyrir ákafa sókn andstæðinganna.
Kadetten varð bikarmeistari á síðasta ári í tíunda sinn.
Kadetten Schaffhausen og Pfadi Winterthur er í tveimur efstu sætum A-deildarinnar í Sviss og ljóst að tvö bestu lið landsins um þessar mundir mætast í úrslitaleiknum sem hefst klukkan 17 á morgun.
