Átján ára landslið karla í handknattleik vann stórsigur á austurríska landsliðinu í annarri umferð Sparkassen Cup-mótsins í Merzig í Þýskalandi í morgun, 32:20. Staðan að loknum fyrri hálfleik var 15:9. Íslenska liðið hefur þar með unnið tvo fyrstu leiki sína á mótinu. Síðasti leikur riðlakeppninnar verður síðar í dag gegn hollenska landsliðinu.
Hollendingar töpuðu fyrir Austurríkispiltum í gær, 25:17, og Slóvenum í morgun, 26:16. Íslenska liðið vann öruggan sigur á slóvenska liðinu í gær, 29:24.
Á morgun tekur við krossspil á milli riðla en víst má telja að íslenska landsliðið leiki til undanúrslita. Í hinum riðli mótsins eiga sæti landslið Þýskalands, Portúgal, Serbíu og úrvalslið frá Saarlandi.
Skemmst er frá því að segja að austurríska liðið átti aldrei möguleika í leiknum í morgun. Til þess var íslenska landsliðið alltof sterkur andstæðingur. Varnarleikurinn var framúrskarandi og Anton Máni Francisco Heldersson markvörður var afar góður eins og fleiri leikmenn íslenska liðsins.
Mörk Íslands: Freyr Aronsson 9, Alex Unnar Hallgrímsson 7, Anton Frans Sigurðsson 4/1, Brynjar Narfi Arndal 3/1, Logi Finnsson 3, Bjarki Snorrason 2, Kári Steinn Guðmundsson 2, Ragnar Hilmarsson 1, Patrekur Smári Arnarsson 1.
Varin skot: Anton Máni Francisco Heldersson 13, 39%.
Piltarnir eru farnir til Þýskalands
Öruggur sigur á Slóvenum í fyrsta leiknum í Merzig
- Allir leikir mótsins eru sýndir í beinni útsendingu gegn gjaldi: https://handball-globe.tv/sparkassencup-merzig
