Einar Baldvin Baldvinsson handknattleiksmarkvörður var í kvöld valinn íþróttakarl Aftureldingar í hófi félagsins í Hlégarði. Blakkonan Rut Ragnarsdóttir var valin íþróttakona félagsins.
Einar Baldvin var á dögunum valinn í æfingahóp landsliðsins í fyrsta sinn en fram undan er undirbúningur fyrir Evrópumótið. Hann gekk til liðs við Aftureldingu frá Gróttu sumarið 2024 og stimplaði sig strax inn í hóp Aftureldingar sem barðist um titla á öllum vígstöðum leiktímabilið 2024-2025. Að loknu síðasta tímabili var Einar Baldvin valinn besti markvörður Olísdeildar karla og það sem af er núverandi leiktíð hefur hann ekki slegið af.
„Auk þess að vera frábær leikmaður innan vallar er Einar Baldvin einnig frábær leikmaður utan vallar. Einar Baldvin æfir eins og atvinnumaður, er mjög metnaðarsamur og stefnir alltaf hærra.
Einar Baldvin er hvetjandi, kurteis og faglegur og ber mikla virðingu fyrir klúbbnum og menningu klúbbsins. Einar er fyrirmynd í einu og öllu og hefur í dag tekið að sér mikilvægt leiðtogahlutverk í liðinu ásamt öðrum eldri leikmönnum. Einar hefur tekið að sér að þjálfa markmenn í yngri flokkum Aftureldingar og er ungum iðkendum félagsins ávallt innan handar og tilbúinn að aðstoða í einu og öllu. Við erum stolt af því að eiga landsliðsmanninn Einar Baldvin í Aftureldingu, segir í tilkynningu félagsins.
Þetta er annað árið í röð sem handknattleikskarl Aftureldingar kemur úr röðum handknattleiksfólks. Þorsteinn Leó Gunnarsson hreppti hnossið fyrir árið 2024.
