- Auglýsing -
- Handknattleiksmaðurinn Böðvar Páll Ásgeirsson leikur ekki með Aftureldingu í Olísdeildinni á leiktíðinni. Hann leggur nú stund á meistaranám í hagfræði í Kaupmannahöfn. Þess utan þá fór Böðvar Páll í aðgerð á vinstri öxl í maí eftir að hafa farið úr axlarlið á síðasta keppnistímabili. Hann er þar af leiðandi að jafna sig í öxlinni samhliða meistaranáminu í Höfn.
- Þýska 2. deildarliðið EHV Aue, sem Arnar Birkir Hálfdánsson og Sveinbjörn Pétursson leika með, vann B-lið Füchse Berlin í æfingaleik um liðna helgi. Því miður liggur ekkert fyrir hvernig Íslendingarnir stóðu sig í leiknum. Bob Hanning, framkvæmdstjóri Berlínar-liðsins var hinsvegar óhress með sína menn enda fátt sem honum er óviðkomandi.
- Króatíski varnarsérfræðingurinn Alen Blažević yfirgaf Pick Szeged í sumar og gekk til liðs við rúmenska liðið HC Dobrogea Sud.
- Þýski línumaðurinn Manuel Späth ákvað að freista gæfunnar í Portúgal á næsta keppnistímabili. Hann er nú liðsmaður Porto eftir að hafa leikið með Stuttgart um skeið.
- Eistinn Mait Patrail gaf Hannover-Burgdorf upp á bátinn í sumar og skrifaði undir eins árs samning við Rhein-Neckar Löwen og verður þar með samherji Alexanders Peterssonar og Ýmis Arnar Gíslasonar í þýsku 1. deildinni en keppni í henni hefst um mánaðamótin.
- Auglýsing -
