Frábær aðsókn var á opna æfingu karlalandsliðsins í handknattleik sem fram fór í íþróttahúsinu í Safamýri fyrir hádegið í dag. Nærri hverju sæti var skipað á áhorfendabekkjunum þær 100 mínútur sem æfingin stóð yfir. Í síðasta hluta æfingarinnar var skipt í lið og léku landsliðsmenn tvívegis í tíu mínútur með mismunandi uppstillingum og áherslum.
Ótrúlega ánægður
„Ég er ótrúlega ánægður með mætinguna og hversu vel tókst til,“ sagði Jón Gunnlaugur Viggósson íþróttastjóri HSÍ við handbolta.is þegar tíðindamaður rak inn nefið og fylgdist með æfingunni.
Að æfingunni lokinni árituðu leikmenn landsliðsins á plaköt, búninga, bolta eða hvað annað sem lauslegt var. Einnig voru myndavélar óspart notaðar. Í lokin bauð Emmessís upp á ís. Óhætt er að segja að þessari nýung, þ.e. að vera opna æfingu, hafi verið afar vel tekið.
Íslenska landsliðið fer til Frakklands 8. janúar og leikur tvo vináttuleiki. Fyrsti leikur landsliðsins verður gegn Ítalíu í Kristianstad Arena föstudaginn 16. janúar og hefst klukkan 17.
Hér fyrir neðan eru nokkrar myndir frá æfingunni í morgun.
(smellið á myndirnar til þess að sjá þær stærri)
