Hinn sigursæli franski þjálfari Emmanuel Mayonnade hefur framlengt samning sinn við franska meistaraliðið Metz til ársins 2027. Mayonnade, sem er 42 ára gamall, hefur verið einstaklega sigursæll á rúmum áratug í þjálfarastól Metz. Hann var einnig landsliðsþjálfari Hollands frá 2019 til 2021. Hollenska landsliðið varð heimsmeistari undir stjórn Mayonnade 2019.
Metz hefur átta sinnum unnið franska meistaratitilinn í kvennaflokki síðan Mayonnade tók við og sex sinnum bikarkeppnina. Herslumun hefur vantað upp á gullverðlaun í Meistaradeild Evrópu en aðeins ein bronsverðlaun hafa komið í hlut Metz undir stjórn Mayonnade og þrisvar sinnum fjórða sætið, þ.e. liðið hefur tapað báðum leikjum úrslitahelganna.
Leikmenn Metz hafa einnig framlengt samninga sína upp á síðkastið. Suzanne Wajoka fetaði í fótspor þjálfarans og skrifaði undir samning til 2027. Yvana Atamgana ritaði undir samning til 2029.
