Ítalska landsliðið vann það færeyska, 36:34, í fyrri vináttuleik þjóðanna í handknattleik karla í Þórshöfn í kvöld en troðfullt var út úr dyrum í þjóðarhöllinni við Tjarnir. Færeyingar voru tveimur mörkum yfir í hálfleik, 19:17, og náðu mesta sex marka forskoti í síðari hálfleik áður en þeim féll allur ketill í eld við mótspyrnu ítalska landsliðsins. Ítalir verða fyrsti andstæðingur íslenska landsliðsins í riðlakeppni Evrópumótsins í Kristianstad eftir viku.
Þetta var fyrsta tap færeyska karlalandsliðsins á heimavelli í nærri fjögur ár.
Færeyingar og Ítalir mætast aftur á sunnudaginn.
Besti handknattleiksmaður Færeyinga, Elias Ellefsen á Skipagøtu, tók ekki þátt í leiknum. Óvíst er um þátttöku hans síðari leiknum.
Þegar Færeyingar voru fimm mörk yfir er leið á síðari hálfleikinn ákvað landsliðsþjálfarinn að hvíla Óla Mittún, Vilhelm Poulsen, Hákun West af Teigum og Teis Horn Rasmussen. Skiljanlega veikti það færeyska liðið auk fjarveru Skipagøtu.
Færeyingar eru einnig á leiðinni á Evrópumótið og það í annað sinn í röð. Þeir leika í Bærum í Noregi með Slóvenum, Svartfellingum og Sviss.
Gríðarlegur áhugi var fyrir leiknum utan jafnt sem innan Færeyja. Svo mikill var áhuginn að vefur færeyska sjónvarpsins, Kringvarpið, réði ekki við umferðina eftir því sem fram kemur á vefsíðunni Portal.fo.
Óli Mittún skoraði sex mörk og var markahæstur hjá Færeyingum. Rói Ellefsen á Skipagøtu var næstur með fimm mörk ásamt Vilhelm Poulsen, fyrrverandi leikmanni Fram.
EM karla 2026 – leikdagar, leikstaðir, leiktímar
