Eftir viðureignina við Frakka í gær fá leikmenn landsliðsins í handknattleik aðeins lausan tauminn í dag. Snorri Steinn Guðjónsson sagði við handbolta.is í gær að í dag yrði lögð áhersla á endurheimt hjá leikmönnum í lyftingasal. „Leikmenn fá frí seinni hluta dagsins og ég ætla líka að hvíla þá frá fundarhöldum. Við tökum síðan upp þráðinn á þriðjudaginn. Þá hefst fyrsti fasinn í undirbúningnum fyrir fyrsta leikinn á EM á föstudaginn gegn Ítalíu,“ sagði Snorri Steinn.
Landsliðið og starfsmenn þess kveðja París árla á miðvikudagsmorgun og taka flugið frá París til Kastrup í Kaupmannahöfn. Þaðan verður farið með langferðabifreið til Kristianstad í Svíþjóð. Reikna má með að ferðin frá Kastrup til Kristinstad taki hátt í tvo tíma. Eftir komu þangað verður væntanlega farið á æfingu upp úr miðjum degi.
Öll dagskrá landsliðsins er vandlega skipulögð eftir að komið verður til Svíþjóðar, m.a. er allir æfingatímar ákveðnir í samráði við mótshaldara.
