Sænska landsliðskonan Linn Blohm og línukona Evrópumeistara Györi í Ungverjalandi verður frá keppni næsta árið eftir að hafa slitið krossband á dögunum. Hún mun gangast undir aðgerð í Svíþjóð fljótlega en endurhæfingin fer fram undir stjórn sjúkraþjálfara ungverska liðsins.
„Þetta er virkilega erfitt andlega og ég veit að það verða hæðir og lægðir á þeirri vegferð sem bíður mín. En ég mun gera mitt besta til að koma sterkari til baka og eins fljótt og auðið er,“ skrifar Blohm í færslu á Instagram.
Blohm er ein af reyndari handknattleikskonum Svía um þessar mundir. Hún hefur leikið nærri 200 landsleiki á síðustu 13 árum. Til Györ kom hún fyrir fimm árum og hefur leikið afar stórt hlutverk hjá liðinu sem varð Evrópumeistari á síðustu leiktíð og hefur ekki tapað leik til þess í Meistaradeildinni á keppnistímabilinu.
