Þýski landsliðsmaðurinn Renars Uscins sneri sig á ökkla í síðasta undirbúningsleik Þýskalands fyrir EM gegn Króatíu í gær. Vonir standa til þess að hann hafi sloppið með skrekkinn.
„Hann leit nokkuð vel út í morgun en mun ekki æfa í dag. Við erum sannfærðir um að hann verði klár í leikinn gegn Austurríki. Fóturinn versnaði ekki í nótt, sem er gott merki,“ sagði Benjamin Chatton, liðsstjóri Þýskalands, á blaðamannafundi að því er Handball World greinir frá.
„Ég finn aðeins fyrir sársauka, sem var viðbúið. Við verðum bara að sjá til hvernig mál þróast,“ sagði Uscins í dag.
Uscins er örvhent skytta sem sló í gegn með þýska landsliðinu á EM 2024 og síðar sama á Ólympíuleikunum.
Þýskaland hefur leik á EM gegn Austurríki á fimmtudagskvöld í Jyske Bank Boxen í Herning á Jótlandi.
