Óli Mittún, einn öflugasti handknattleiksmaður Færeyja, æfði ekkert með landsliðinu í Þórshöfn í dag. Hann fór af leikvelli eftir 20 mínútur í viðureign Færeyinga og Ítala á sunnudaginn vegna eymsla í hásinum. Meiðsli Óla koma ofan í óvissu vegna axlarmeiðsla Elias Ellefsen á Skipagøtu. Frændurnir, Óli og Elias, eru sannkallaðir lykilmenn færeyska landsliðsins sem hefur keppni á Evrópumótinu á fimmtudaginn.
Samkvæmt færeyska fréttamiðlinum Portal.fo standa vonir til þess að meiðsli Óla séu ekki mjög alvarleg. Engin áhætta verður þó tekin svo skömmu fyrir EM. Óvíst er hversu mikið Óli æfir með færeyska landsliðinu fyrir fyrsta leikinn sem verður við landslið Úkraínu á fimmtudagskvöld.
Enn leikur mikill vafi á hversu mikið Elias getur tekið þátt í fyrsta leik á EM. Hann hefur alls ekki jafnað sig af axlarmeiðslum sem hann varð fyrir í leik með THW Kiel í þýsku 1. deildinni 20. desember eins og handbolti.is sagði frá í gær.
Færeyska landsliðið flýgur af stað til Óslóar snemma í fyrramálið en leikir þess í riðlakeppninni við Úkraínu, Svartfjallaland og Slóveníu fara fram í Bærum/Forbebu-svæðinu í útjaðri norsku höfuðborgarinnar.
Færeyingar hafa áhyggjur af stjörnunni
