Sigurleikjunum fjölgar hjá Elínu Klöru

Áfram er IK Sävehof með landsliðskonuna Elínu Klöru Þorkelsdóttur á sigurbraut í sænsku úrvalsdeildinni í handknattleik. Í kvöld lagði IK Sävehof liðskonur Kungälvs HK, 35:24, á heimavelli í upphafsleik 14. umferðar. Elín Klara skoraði sex mörk og var næstmarkahæst í sínu liði. Einnig gaf hún tvær stoðsendingar. Eitt markanna skoraði Hafnfirðingurinn úr vítakasti.

Leikurinn fór fram í Partille, heimavelli Sävehof.

IK Sävehof hefur unnið 13 af 14 leikjunum til þessa í úrvalsdeildinni og hefur örugga forystu. Leikmenn Önnereds hafa önglað saman 21 stigi í 13 leikjum og Skara-liðar 18 stig, einnig í 13 viðureignum.