ÍR-ingar sneru við taflinu í síðari hálfleik í viðureign sinn við Þór Akureyri í Austurbergi í kvöld og unnu með fimm marka mun, 36:31, og hafa þar með fjögur stig eins og Hörður í efsta sæti deildarinnar. Þórsarar eru með tvö stig.
Mikið gekk á í fyrri hálfleik og var lítið um varnir og þeim mun meira skorað. Gestirnir frá Akureyri voru ákafari við þá iðju og voru fyrir vikið með fjögurra marka forystu þegar gengið var til búningsherbergja í hálfleik, 20:16.
Varnarleikur ÍR-liðsins var allt annar og betri í síðari hálfleik. Hann lagði grunn að því að liðinu tókst að snúa við taflinu og vinna með fimm marka mun eins og fyrr sagði.
Tveir leikmenn ÍR fengu beint rautt spjald í leiknum. Strax á þriðju mínútu gat Dagur Sverrir Kristjánsson farið í sturtu og á 47. mínútu fór Gabríel Freyr Kristinsson sömu leið.
Mörk ÍR: Arnar Freyr Guðmundsson 9, Hrannar Ingi Jóhannsson 8, Kristján Orri Jóhannsson 7, Andri Heimir Friðriksson 4, Eyþór Waage 2, Bjarki Steinn Þórisson 2, Ólafur Atli Malmquist 2, Tómas Starrason 1, Gabríel Freyr Kristinsson 1.
Mörk Þórs Arnór Þorri Þorsteinsson 10, Halldór Yngvi Jónsson 4, Garðar Már Jónsson 4, Jón Ólafur Þorsteinsson 3, Aron Hólm Kristjánsson 2, Elvar Örn Jónsson 2, Viktor Jörvar Kristjánsson 2, Arnar Þór Fylkisson 1, Aðalsteinn Ernir Bergþórsson 1, Auðunn Ingi Valtýsson 1, Ágúst Örn Vilbergsson 1.
Stöðuna og næstu leiki í Grill66-deild karla má sjá hér.
