„Þorsteinn Leó er á góðum stað og Einar Þorsteinn er að braggast eftir veikindi,“ sagði Snorri Steinn Guðjónsson landsliðsþjálfari í handknattleik spurður í dag um stöðuna á þeim tveimur leikmönnum sem ekki hafa enn leikið með íslenska landsliðinu í handknattleik á Evrópumótinu; Þorsteini Leó Gunnarssyni og Einari Þorsteini Ólafssyni.
Var í testi í morgun
„Þorsteinn hefur aðeins æft með okkur en við höfum ekki látið mikið á hann reyna enda æfingarnar kannski ekki eins miklar hjá okkur og áður. Þorsteinn var síðast í testi hjá sjúkraþjálfurum í morgun. Þau gengu vel. Hugmyndin er sú að þegar við komum til Malmö munum við láta á hann reyna. Mér finnst líklegt að Þorsteinn taki þátt í æfingu daginn fyrir fyrsta leik í milliriðli [22. janúar]. Að þeirri æfingu lokinni þá þykir mér líklegt að við vitum meira hvort og þá hvenær hann getur verið með okkur,“ sagði Snorri Steinn.
Ekki til íhugunar
Spurður hvort hann íhugi að kalla inn leikmenn í hópinn sagði hann svo ekki vera eins og ástatt væri.
„Þegar og ef ég kalla inn leikmann þá er ekki hægt að ætlast til þess að sá maður umturni öllu fyrir okkur. Ég er með 18 leikmenn hér ytra, þar af eru 16 heilir auk þess sem Einar Þorsteinn er að sækja í sig veðrið á nýjan leik. Mér dettur ekki í hug að kalla inn menn bara til þess að kalla inn mann,“ sagði Snorri Steinn Guðjónsson landsliðsþjálfari í viðtali við handbolta.is í dag.
