Danski landsliðsmaðurinn Lukas Jørgensen leikur ekki fleiri leiki með heimsmeisturum Danmerkur á Evrópumótinu í handknattleik. Í raun verður Jørgensen fjarri handboltavellinum næsta árið. Hann varð fyrir því óláni að slíta krossband í viðureign Dana og Rúmena í fyrrakvöld.
Fjarvera Jørgensen frá leikvellinum verður einnig blóðtaka fyrir þýska liðið Flensburg-Handewitt hvar hann hefur leikið síðustu þrjú ár.
Áður en Jørgensen meiddist var Nikolaj Jacobsen landsliðsþjálfari Dana með 18 leikmenn í sínum hóp. Hann hefur ekki kallað inn mann til þess að fylla skarð Jørgensen. Hugsanlega verður það gert áður en milliriðlakeppnin hefst.
Danska landsliðið mætir portúgalska landsliðinu í Jyske Bank Boxen í kvöld í uppgjöri tveggja efstu liða B-riðils. Viðureignin hefst klukkan 19.30.
