Aron Kristjánsson landsliðsþjálfari Kúveit er kominn með lið sitt í átta liða úrslit Asíukeppninnar í handknattleik karla. Kúveit lagði Sameinuðu arabísku furstadæmin, 27:22, í þriðju umferð riðlakeppninnar. Kúveitar unnu þar með allar þrjár viðureignir sínar í riðlinum. Fyrr í keppninni lögðu þeir Indverja og Hong Kongbúa nokkuð auðveldlega.
Að þessu sinni er Asíukeppnin undankeppni fyrir HM sem fram fer í Frakklandi og Þýskalandi á næsta ári. Fjögur landslið úr keppninni tryggja sér farseðilinn á HM.
Auk Kúveit eru landslið Katar, Suður Kóreu, Barein, Írak, Sádi Araba, Japana og Sameinuðu arabísku furstadæmanna komin í átta liða úrslit sem hefjast á fimmtudaginn. Leikið verður í tveimur fjögurra liða riðlum. Kúveit mætir Írak á fimmtudaginn, Japan á föstudag og að öllum líkindum Katar á sunnudaginn.
