Áhöfn Harðarliðsins varð fyrir ágjöfum

Annað af toppliðum Grill66-deild karla, Hörður, á Ísafirði hefur þurft að sitja undir ágjöfum á áhöfn sinni síðustu daga eftir því sem næst verður komist.

Lettinn Endijs Kusners, sem kom til Harðar um mitt síðasta tímabil, mun hafa farið úr axlarlið í viðureign Harðar og ungmennaliðs Selfoss á föstudagskvöldið í íþróttahúsinu á Torfnesi. Sé svo þá verður Kusners vart með liðinu á næstunni. Hann skoraði fjögur mörk í leiknum.

Til viðbótar mun Spánverjinn Mikel Amilibia Aristi hafa fingurbrotnað fyrir skömmu. Af þeim sökum tók hann ekki þátt í leik Harðar og ungmennaliðs Selfoss á föstudaginn, leik sem Hörður vann með fimm marka mun, 37:32, og settist í framhaldinu í efsta sæti Grill66-deildarinnar.