Aftureldingarmenn gerðu góða ferð austur á Selfoss í kvöld og kræktu þar í fyrsta sigur sinn í Olísdeild karla er þeir lögðu lið Selfoss í Sethöllinni, 26:24, eftir að staðan var jöfn að loknum fyrri hálfleik, 14:14.
Afturelding hefur þar með þrjú stig að loknum þremur leikjum. Selfoss er með tvö en hefur leikið fjóra leiki þar sem einni viðureign var flýtt vegna þátttöku í Evrópukeppnin síðar í þessum mánuði.
Segja má að leikurinn í Sethöllinni í kvöld hafi verið jafn lengst af. Þegar kom fram í miðjan síðari hálfleik náði Aftureldingarliðið frumkvæði sem það hélt til leiksloka. Sóknarleikurinn bilaði nokkuð hjá leikmönnum Selfoss en varnarleikurinn var góður og Vilius Rasimas var frábær í markinu. Það nægði ekki.
Atli Ævar Ingólfsson er fjarri góðu gamni hjá Selfossi. Eins eru þeir Guðmundur Hólmar Helgason og Tryggvi Þórisson ekki komnir til baka að ráði þótt þeir hafi verið á skýrslu í síðustu leikjum.
Sveinn Andri Sveinsson var á skýrslu hjá Aftureldingu í kvöld í fyrsta sinn á leiktíðinni en hafði sig lítt í frammi.
Mörk Selfoss: Ragnar Jóhannsson 6, Hergeir Grímsson 5/1, Alexander Már Egan 4, Richard Sæþór Sigurðsson 3, Einar Sverrisson 2, Ísak Gústafsson 2, Karolis Stropus 1, Elvar Elí Hallgrímsson 1.
Varin skot: Vilius Rasimas 17, 41,5% – Sölvi Ólafsson 0.
Mörk Aftureldingar: Guðmundur Bragi Ástþórsson 7/4, Árni Bragi Eyjólfsson 4, Blær Hinriksson 3, Hamza Kablouti 3, Gunnar Kristinn Malmquist Þórsson 2, Birkir Benediktsson 2, Þorsteinn Leó Gunnarsson 2, Einar Ingi Hrafnsson 2, Bergvin Þór Gíslason 1.
Varin skot: Andri Sigmarsson Scheving 11, 32,4%, Brynjar Vignir Sigurjónsson 0.
Stöðuna og næstu leiki í Olísdeild karla má sjá hér.
Alla tölfræði leiksins er að finna hjá HBStatz.
