„Við vorum bara alls ekki nógu góðir. Það var einstefna í þessum leik frá upphafi. Svíar voru töluvert betri,“ sagði Dagur Sigurðsson landsliðsþjálfari Króatíu eftir átta marka tap, 33:25, fyrir Svíum í síðasta leik E-riðils Evrópumóts karla í handknattleik í Malmö Arena í gærkvöld.
Án stiga
Svíar unnu þar með riðilinn og halda áfram í milliriðil með tvö stig. Króatar fara áfram án stiga og mæta íslenska landsliðinu á morgun, föstudag, í fyrstu umferð milliriðlakeppninnar.
„Okkar markmið verður ekki að vera með í milliriðli, heldur verður markmiðið að vinna leiki í milliriðli,“ bætti Dagur við í stuttu viðtali við heimasíðu EHF að leikslokum.
Viðureign Íslands og Króatíu hefst klukkan 14.30 á morgun.
Sex marka sigur í fyrra
Mörgum er eflaust í fersku minni viðureign Króatíu og Íslands á heimsmeistaramótinu fyrir ári síðan. Króatar unnu með sex marka mun, 32:26, eftir að hafa gert út um leikinn í fyrri hálfleik. Staðan var 20:12 eftir 30 mínútur.
