Norðmenn lögðu Spánverja í háspennuleik, 35:34, í milliriðlakeppni Evrópumóts karla í kvöld. Tvisvar sinnum á síðustu 11 sekúndum leiksins þurftu dómararnir að líta á skjáinn og skoða upptökur til að kanna hvort spænska liðið ætti rétt á vítaköstum. Í hvorugt skiptið áttu Spánverjar rétt á vítaköstum og Norðmenn fögnuðu ógurlega eins og þeim var von og vísa þegar sigurinn var í höfn.
Noregur er þar með kominn á blað í milliriðlakeppninni. Spánn er hins vegar stigalaus og má alls ekki við frekari skakkaföllum ef einhver von á að vera um að leika hið minnsta um 5. sætið sem veitir keppnisrétt á HM á næsta ári.
Norska liðið sýndi svo um munaði að það er til alls líklegt á EM. Allt annað er að sjá til lærisveina Jonas Wille en á HM fyrir ári þegar liðinu féll allur ketill í eld.
Staðan var jöfn í hálfleik í Jyske Bank Boxen í Herning, 16:16. Leikurinn var síðan hnífjafn og æsilega spennandi allt til enda.
EM karla 2026 – milliriðlar – leikir, úrslit, staðan, leiktímar
August Pedersen fór á kostum í vörn sem sókn og skoraði 11 mörk fyrir norska landsliðið. Tobias Grøndahl og Thomas Solstad skoruðu fimm sinnum hvor.
Aleix Gómez skoraði átta mörk og var markahæstur Spánverja. Alex Dujshebaev skoraði fimm mörk.
Hér fyrir neðan er upptaka af frábærum varnarleik Norðmannsins August Pedersen á lokasekúndum leiksins í kvöld.
