Komnar til Kósovó – löng ferð sem gekk svaðalega vel

Leikmenn Íslands- og bikarmeistarar KA/Þórs komu til Istogu í Kósovó um miðjan dag eftir 25 stunda ferðalag frá Akureyri. Eftir komuna hafa liðsmenn tekið því rólega. Á morgun verður æft í keppnishöllinni fyrir leikina tvo við lið Istogu.

Istogu er ríkjandi landsmeistari Kósovó og hefur verið yfirburðalið í kvennahandknattleik í landinu undanfarin ár.

Viðureignirnar við Istogu eru liður í annarri umferð Evrópubikarkeppninnar í handknattleik. KA/Þór sat yfir í fyrstu umferð. Um leið verða leikirnir þeir fyrstu í Evrópukeppni í sögu kvennaliðs KA/Þórs. Fara þeir fram á föstudag og á laugardag. Hefjast þeir stundvíslega klukkan 16 báða dagana. Handbolti.is mun eftir fremsta megni fylgjast með framvindu þeirra. Nánar verður sagt frá því þegar nær dregur.

Siguróli Sigurðsson, starfsmaður KA, sem er með KA/Þórsliðinu í för sagði í skilaboðum til handbolta.is rétt áðan að ferðalagið til Kósovó hafi gengið „svaðalega vel“ þótt það hafi verið langt og strangt eins og við var búist. Tekið var á móti hópnum af mikill gestrisni.

Nánar var sagt frá ferðatilhögun KA/Þórsliðsins hér.