- Auglýsing -
Eftir ljúfan nætursvefn og staðgóðan morgunverð á Hotel Trofta í Istogu í Kósovó fóru leikmenn Íslands- og bikarmeistara KA/Þórs á æfingu í keppnishöllinni fyrir hádegið í dag. Æfingin gekk vel og líst leikmönnum og þjálfurum vel á aðstæður.
Tilhlökkun ríkir í hópnum fyrir leikjunum tveimur við heimaliðið Istogu í Evrópubikarkeppninni sem fram fara á morgun og á laugardaginn. Viðureignin á morgun verður sú fyrsta í sögu KA/Þórs í Evrópukeppni í kvennaflokki og ljóst að enn er liðið að skrifa söguna.
Allir leikmenn tóku þátt í æfingunni sem gekk áfallalaust fyrir sig og voru þeir ferskir eftir langt og strangt sólarhringslangt ferðalag frá Akureyri til Istogu.
Mótttökur og viðurgjörningur er til sóma.
Meðfylgjandi eru nokkrar myndir frá æfingunni í morgun og liðsfundi sem Andri Snær Stefánsson stjórnaði af röggsemi. Á fundinum voru lagðar línur fyrir leikinn á morgun sem hefst klukkan 16.
- Auglýsing -
