Rúnar Kárason stórskytta ÍBV er afar ósáttur við að hafa verið úrskurðaður í eins leiks bann eftir að hafa fengið rautt spjald í viðureigna ÍBV og KA í Olísdeild karla í handknattleik karla á síðasta sunnudag fyrir brot á Patreki Stefánssyni leikmanni KA.
Rúnar segir í færslu á Facebook að dómararnir hafi haft afar veikar forsendur fyrir dómi sínum og hreinlega giskað á hver hinn brotlegi hafi verið. Á upptöku frá leiknum sé ekki hægt að fá úr því skorið hvort brotið hafi verið svo alvarlegt að það réttlæti eins leiks keppnisbann.
Rúnar segir ennfremur á Facebook að hann hafi rætt við dómarana eftir viðureignina og þá hafi komið fram að annar þeirra hafi ekkert séð hvað gerðist en hinn hafi séð útrétta hendi og höfuð kastast til en hafi ekki verið viss hvers eign hendin væri.
„Ég er síðan fullvissaður um það að í ljósi þess að ég sé ekki með nein rauð spjöld á bakinu og sjaldan gefin leikbönn að ég muni aldrei fara í bann.
Þegar ég síðan fæ bann og öllum til mikillar furðu þá fást þau svör hjá HSÍ að erfitt sé að sjá á videoi hvort ég fari í andlit eða hvort hnefi eða opinn lófi sé á lofti en eftir stendur skýrsla dómara að leikmaður 5 slái leikmann 4 í andlitið.
Í þessu öllu saman sér enginn neitt sérstaklega vel hvað gerist, hvorki dómarar né aganefnd en í ljósi afleiðingana að leikmaður liggur sárkvalinn (sem hann var ekki, hann sagði mér það sjálfur) þá giska menn bara á það versta og veita mér eins leiks bann og ég telst víst heppinn að hafa sloppið með einn leik,“ segir Rúnar sem á löngum handknattleiksferli hefur fremur verið þekktur fyrir heiðarleika á vellinum en fantaskap.
Rúnar tekur út leikbann í toppslag Olísdeilar karla á sunnudaginn þegar taplausu lið deildarinnar Valur og ÍBV mætast í Origohöll Valsmanna. Færslu Rúnars í heild má lesa hér fyrir neðan.
