Ef íslenska landsliðið kemst í undanúrslit Evrópumótsins í handknattleik karla er ljóst að erfitt verður fyrir stuðningsmenn landsliðsins að verða sér úti um miða á leiki undanúrslita og úrslita á föstudag og sunnudag í Jyske Bank Boxen í Herning eftir því sem handbolti.is er uppselt á báða leikdaga.
Aðeins hafa verið teknir frá 100 miðar fyrir leikmenn og þjálfara til ráðstöfunar á fjölskyldur sínar og til stjórnenda HSÍ og öflugustu bakhjarla sambandsins.
Danir hafa fyrir löngu keypt miða enda danska landsliðið nánast árlega í undanúrslitum stórmóta.
Veik von um lausa miða ef…
Lánist íslenska landsliðinu að verða í undanúrslitum gæti von Íslendinga um miða legið í að þýska landsliðið komist ekki í undanúrslit. Stuðningsmenn þýska landsliðsins hafa keypt eitthvað magn miða sem fer hugsanlega í endursölu ef Þjóðverjar verða ekki í hópi liðanna í undanúrslitum.
Ekki er heldur útilokað að sænskir og franskir stuðningsmenn hafi keypt miða sem þeir vilja losna við ef lið þeirra verða ekki í undanúrslitum. Vafalítið er ekki um mikið magn að ræða hjá Frökkum sem sækja ekki handboltaleiki út fyrir landamærin í stórum hópum.
Áður en reynt verður að ná í miða á úrslitahelgina er rétt að bíða eftir viðureign Íslands og Slóveníu sem hefst klukkan 14.30 í Malmö Arena í dag. Íslandi dugir ekkert minna en sigur til þess að komast í undanúrslit á EM í fyrsta sinn í 16 ár.
