Sigvaldi Björn Guðjónsson, fyrirliði Kolstad í Noregi, hefur verið kallaður inn í íslenska landsliðshópinn sem ferðaðist í dag til Herning. Sigvaldi er þegar kominn til móts við hópinn og því klár ef á þarf að halda á morgun í undanúrslitum og í verðlaunaleiknum á sunnudaginn.
Ekki eru meiðsli í íslenska hópnum. Koma Sigvalda Björns mun fyrst og síðast vera varúðarráðstöfun vegna komandi tveggja erfiðra leikja.
Sigvaldi Björn var ekki valinn í EM-hópinn m.a. vegna meiðsla. Hann mun hafa jafnað sig og er klár í slaginn ef þörf verður á. Sigvaldi Björn hefur leikið 85 landsleiki og skorað 230 mörk, þar af 22 leiki á síðustu þremur Evrópumótum og skorað í þeim 67 mörk. M.a. lék hann alla leiki íslenska landsliðsins á covid Evrópumótinu 2022 nánast frá upphafi til enda.
Meiddist í nóvember
Síðast var Sigvaldi Björn valinn í íslenska landsliðið fyrir leikina í Þýskalandi í lok október og í byrjun nóvember. Hann meiddist á æfingu fyrir fyrri viðureignina og var ekkert með í leikjunum.
