- Auglýsing -
Lið ÍR í Grill66-deild kvenna í handknattleik fékk liðsstyrk í dag þegar Karen Tinna Demian ákvað að koma til liðsins á nýjan leik. Hún kemur til ÍR-inga á lánssamningi frá Stjörnunni og gildir samningurinn út yfirstandandi leiktíð.
Karen Tinna hefur spilað í Olísdeildinni með Stjörnunni í þrjú tímabil en tímabilið áður en hún færði sig um set var hún markahæsti leikmaður ÍR í Grill66-deildinni með 147 mörk.
„Það er mikil ánægja hjá ÍR að fá þennan frábæra leikmann heim til að taka slaginn, að koma félaginu í Olís deildina á næsta ári. Karen er frábær leikmaður, mikill leiðtogi og mikill félagi,“ segir Matthias Imsland formaður handknattleiksdeildar ÍR á Facebook-síðu handknattleiksdeildar ÍR.
„Ég er mjög spennt að taka slaginn með ÍR, liðið er mjög efnilegt og umgjörðin hjá félaginu er orðin mjög góð. ÍR tekur í notkun nýtt íþróttahús í maí á næsta ári svo öll aðstaða hjá félaginu verður eins og best er á kosið. Með þessa umgjörð og aðstöðu á ÍR heima í deild þeirra bestu,“ er haft eftir Karen Tinnu á sömu síðu.
- Auglýsing -
