Handknattleikssamband Íslands hefur ráðið Jón Gunnlaug Viggósson í starf yfirþjálfara í Hæfileikamótun og Handboltaskóla HSÍ. Jón Gunnlaugur er með EHF Master Coach þjálfaragráðu og Coaching Pro þjálfararéttindi EHF.
Jón Gunnlaugur býr yfir 16 ára reynslu sem þjálfari yngri flokka og komið að meistaraflokks þjálfun síðustu 11 ár. Hann er nú um stundir þjálfari meistaraflokks karla hjá Víkingi ásamt því að vera yfirþjálfari Handknattleiksdeildar Víkings.
Hæfileikamótun- og Handboltaskóli HSÍ heldur utan um yngstu hópana í afreksstarfi HSÍ. Komið er saman til æfinga fjórum sinnum á ári, tvo daga í senn og mæta um 100 krakkar í hvert skipti.
„Markmið HSÍ er að gefa krökkunum sömu upplifun og aðstöðu og yngri landslið HSÍ æfa við hverju sinni. Þarna er fyrsta skrefið stigið í átt að landsliðsverkefnum framtíðarinnar.
HSÍ lýsir yfir mikilli ánægðju með að fá Jón Gunnlaug til starfa sem yfirþjálfara þessara tveggja mikilvægu verkefna,“ segir m.a. í tilkynningu frá Handknattleikssambandi Íslands.
