Íslands- og bikarmeistarar KA/Þór leika ytra báða leiki sína við spænsku bikarmeistarana CB Elche í 32-liða úrslitum Evrópubikarkeppninnar í handknattleik. Frá þessu er greint á Akureyri.net.
Þar er haft eftir Erlingi Kristjánssyni formanni kvennaráðs KA/Þórs að forráðamenn beggja félaga hafi verið áfram um að fá báða leikina heim til sín. Niðurstaðan hafi orðið sú að leika ytra síðari helgina sem leikir 32-liða úrslitanna eiga að fara fram.
KA/Þór lék einnig í tvígang í Kósovó gegn KHF Istogu í annarri umferð eða 64-liða úrslitum.
Leikirnir verð í Elche, skammt frá Alicante, 20. og 21. nóvember og telst fyrri viðureignin vera heimaleikur KA/Þórs. Það verða væntanlega síðustu leikir KA/Þórs um skeið því í vikunni eftir taka við æfingar og vináttuleikir hjá íslenska landsliðinu.
Hlé verður gert á keppni í Olísdeildinni frá 20. nóvember til 4. desember. Víst er að fyrirhugaður leikur ÍBV og KA/Þórs laugardaginn 20. nóvember fer ekki fram þann dag.
Frétt akureyri.net.
