Tveir leikir verða í Olísdeild kvenna í dag og sömuleiðis eru tvær viðureignir á dagskrá í Grill66-deild karla þar sem efstu liðin, Hörður og ÍR, verða í eldlínunni á heimavelli.
Íslandsmeistarar KA/Þórs fá HK í heimsókn í KA-heimilið klukkan 15. Meistararnir töpuðu um síðustu helgi sínum fyrsta leik í háa herrans tíð og vilja vafalaust ekki endurtaka leikinn gegn spræku liði HK sem skellti ÍBV fyrir rúmri viku á sannfærandi hátt í Kórnum.
ÍBV, sem stóð í ströngu í Evrópukeppni um síðustu helgi, tekur á móti Stjörnunni. Bæði lið hafa átt erfitt uppdráttar í deildinni í upphafsleikjunum. ÍBV sýndi þó í leikjunum við PAOK að meira býr í liðinu en það hefur sýnt í deildinni. Vissulega hefur fjarvera sterkra leikmanna sett strik í reikninginn. Stjarnan hefur átt góða spretti í sumum leikja sinn en leikmenn liðsins vilja vafalaust reka af sér slyðruorðið í Eyjum í dag.
Báðir leikir Olísdeild kvenna í dag hefjast klukkan 15.
ÍR-ingar taka á mót ungmennaliði Vals í Austurbergi klukkan 16 í fjórða leik sínum í Grill66-deild karla. ÍR-liðið er taplaust eftir þrjá leiki en hálfur mánuður er liðinn frá síðasta leik liðsins.
Harðarmenn mæta galvaskir til leiks eftir þrjá sigurleiki þegar ungmennalið Hauka mætir í íþróttahúsið á Torfnesi klukkan 19 í kvöld.
Leikir dagsins
Olísdeild kvenna:
KA-heimilið: KA/Þór – HK, kl. 15 – sýndur á KAtv.
Vestmannaeyjar: ÍBV – Stjarnan, kl. 15 – sýndur á Stöð2Sport.
Stöðuna og næstu leiki í Olísdeild kvenna má sjá hér.
Grill66-deild karla:
Austurberg: ÍR – Valur U, kl. 16.
Ísafjörður: Hörður – Haukar U, kl. 19 – sýndur á youtuberás Viðburðarstofu Vestfjarða.
Stöðuna og næstu leiki í Grill66-deild karla má sjá hér.
