Myndskeið: Undrabarnið skoraði sigurmark frá miðju

Slóvenska undrabarnið Aljuš Anžič, sem sumir kalla sem svo en hann er aðeins á átjánda ári, skoraði sigurmark RK Celje í gærkvöld, 31:30, gegn Krka í úrslitakeppninni um meistaratitilinn í Slóveníu. Anžič var ekkert að tvínóna þegar hann kastaði boltanum frá miðju á síðustu sekúndum leiksins og innsiglaði sigurinn nauma, rétt eftir að leikmönnum Krka mistókst að tryggja sér sigurinn. Markið er að finna í myndskeiði hér rétt fyrir neðan.

Anžič sló sannarlega í gegn á HM 19 ára landsliða í Egyptalandi síðasta sumar er hann skoraði 23 mörk í 25 skotum í viðureign Slóveníu og Noregs og setti markamet á heimsmeistaramóti yngri landsliða karla.