Reynir Stefánsson formaður dómaranefndar HSÍ verður eftirlitsmaður á fyrri viðureign IFK Kristianstad og króatíska liðsins RK Nexe í útsláttarkeppni Evrópudeildar karla í handknattleik í kvöld. Leikurinn fer fram í Kristianstad Arena og hefst klukkan 16.45.
Þrjár viðureignir til viðbótar fara fram í kvöld í útsláttarkeppninni. Leikir síðari umferðar útsláttarkeppninnar verða að viku liðinni. Sigurliðin fjögur í útsláttarkeppninni taka sæti í átta liða úrslitum ásamt sigurliðunum fjórum úr riðlakeppni 16-liða úrslita.
Einar Bragi Aðalsteinsson leikur með IFK Kristianstad gegn RK Nexe í kvöld, aðeins þremur dögum eftir að sænska liðið varð bikarmeistari.
Fleiri verða á ferðinni
Fleiri Íslendingar taka þátt í leikjum útsláttarkeppninnar í kvöld. Kristján Örn Kristjánsson og félagar í Skanderborg AGF mæta Flensburg á heimavelli.
Tryggvi Þórisson verður að vanda með Elverum er liðið sækir Montpellier heim til Frakklands.
Arnar Freyr Arnarsson og Reynir Þór Stefánsson verða væntanlega með MT Melsungen í heimsókn til danska liðsins Fredericia í Middelfart Sparekasse Arena.
