- Auglýsing -
„Mér fannst hugarfarið breytast í hálfleik. Okkur varð ljóst að nauðsynlegt væri að gefa tíu til fimmtán prósent meira í leikinn en við vorum að gera. Það var dauft yfir okkur í fyrri hálfleik sem breyttist sem betur fer því taktískt breyttum við engu í leik okkar,“ sagði Hildigunnur Einarsdóttir leikmaður Vals í samtali við handbolta.is eftir sex marka sigur Vals á Haukum í Olísdeild kvenna í handknattleik í Origohöllinni í dag, 32:26. Valur lék frábærlega í síðari hálfleik eftir að hafa verið marki undir að loknum þeim fyrri, 14:13.
„Við komum mikið ákveðnari í síðari hálfleikinn sem varð þess valdandi að það sem við gerðum var mikið betur gert. Við komum okkur í mjög góða stöðu á fyrstu tíu mínútum seinni hálfleiks og héldum svo okkar striki allt til leiksloka. Seinni hálfleikur var frábær hjá okkur,“ sagði Hildigunnur sem er nokkuð ánægð með leik Valslisins á keppnistímabilinu en það er með fullt hús stiga eftir fjóra leiki í öðru sæti deildarinnar.
„Næsti leikur verður mjög erfiður gegn Fram í næstu viku. Nú hefst undirbúningur fyrir þá viðureign. Við verðum að byrja leikina betur en við höfum gert í síðustu leikjum. Það getur verið of seint að fara af stað í seinni hálfleik. Það mun ekki ganga gegn Fram,“ sagði Hildigunnur Einarsdóttir leikmaður Vals og íslenska landsliðsins í samtali við handbolta.is.
- Auglýsing -
