Reynir Þór fór á kostum – skoraði 21 mark

Reynir Þór Stefánsson fór hamförum í viðureign með ungmennaliði MT Melsungen í viðureign liðsins við SGSH Dragons í 3. deildinni um síðustu helgi. Hann skoraði 21 mark í tveggja marka sigri MT Melsungen II á Drekunum, 38:36. Þar af skoraði Reynir Þór níu fyrstu mörk liðsins á fyrstu 15 mínútum leiksins.

Reynir Þór átti möguleika á að bæta við 22. markinu en vítakast hans missti marks.

Sigurinn fór langt með að tryggja MT Melsungen II áframhaldandi veru í sínum hluta 3. deildar.

Reynir Þór stendur á tvítugu og er þar af leiðandi gjaldgengur með ungmennaliði MT Melsungen II auk þess sem hann missti af mörgum leikjum aðalliðsins á fyrstu mánuðum tímabilsins í haust og í vetur.