Bjarki Már skoraði fimm mörk gegn smáliðinu

Bjarki Már Elísson skoraði fimm mörk í öruggum sigri One Veszprém á Carbonex-Komló, 41:34, í þriðju síðustu umferð ungversku úrvalsdeildarinnar í dag, innan við hálfum öðrum sólarhring eftir að One Veszprém vann Füchse Berlin í fyrri umferð Meistaradeildar Evrópu í handknattleik.

Staðan var 25:18 One Veszprém í vil að loknum fyrri hálfleik.

Segja má að nærri skilji himinn og haf að One Veszprém og Carbonex-Komló. Fyrrnefnda liðið hefur unnið alla 24 leiki sína í deildinni á leiktíðinni. Carbonex-Komló er næst neðst og stefnir í fall úr deildinni.

Tvær umferðir eru eftir af ungversku úrvalsdeildinni áður en One Veszprém og Pick Szeged mætast í árlegum úrslitaleikjum um ungverska meistaratitilinn.