Davíð Georgsson hefur verið ráðinn þjálfari meistaraflokks kvenna hjá ÍR til næstu tveggja ára. Hann tekur við af Grétari Áka Andersen sem lét af störfum á dögunum. Davíð til halds og trausts verður hinn vel þekkti handknattleiksmaður Björgvin Þór Hólmgeirsson.
Davíð er vel þekktur innan ÍR enda var hann fyrirliði meistaraflokks karla í áraraðir og er einn leikjahæsti leikmaður félagsins. Hann hefur undanfarin ár þjálfað í yngri flokkum félagsins.
Hvorki Davíð né Björgvin Þór hafa áður verið þjálfarar í meistaraflokki.
„Stjórn handknattleiksdeildar bindur miklar vonir við ráðningu Davíðs og Björgvins enda heimamenn sem blæða bláu og hvítu,“ segir í tilkynningu ÍR.
ÍR hafnaði í fjórða sæti Olísdeildar kvenna í vetur og féll út í fyrstu umferð úrslitakeppninnar eftir viðureignir við Fram.
