Kristján Örn Kristjánsson, Donni, og liðsfélagar hans í Skanderborg AGF eru komnir í úrslitaeinvígið um danska meistaratitilinn í handknattleik karla. Þeir unnu GOG, 33:26, í annarri viðureign liðanna í dag. Leikið var í Arena Svendborg, heimavelli GOG á Fjóni.
Donni skoraði fjögur mörk og gaf þrjár stoðsendingar. Emil Lærke skoraði átta mörk og var eins og stundum áður markahæstur hjá Skanderborg. Simon Sejr átti stórleik í markinu, varði 17 skot, 50%.
Frederik Pedersen var atkvæðamestur GOG-liða með sex mörk. Óli Mittún skoraði fjögur mörk og gaf fimm stoðsendingar.
Meistarar síðustu ára, Aalborg Håndbold, unnu Mors-Thy, 37: 35, í annarri viðureign liðanna í hinni rimmu undanúrslita. Aalborg Håndbold verður þar með andstæðingur Skanderborg AGF í úrslitarimmunni um meistaratitilinn.
