Orri Freyr Þorkelsson skoraði fimm mörk, fjögur þeirra úr vítaköstum, í 12 marka sigri Sporting Lissabon á Benfica, 34:22, í gær í lokaumferð úrslitakeppni efstu fjögurra liða portúgölsku 1. deildarinnar í handknattleik. Leikurinn skipti ekki miklu máli því Sporting hefur fyrir nokkru síðan unnið meistaratitilinn.
Á hinn bóginn undirstrikaði sigurinn yfirburði Sporting í portúgalska handknattleiknum. Liðið vann alla leiki sína á keppnistímabilinu, bæði í deildinni og í bikarkeppninni auk sigurs í meistarakeppninni í upphafi leiktíðar.
Stiven Tobar Valencia lék ekki með Benfica í leiknum við Sporting í gær, ekkert frekar en í undanförnum viðureignum. Svo virðist sem Stiven sé meiddur.
Þorsteinn Leó var rólegur
Porto hafnaði í öðru sæti portúgölsku deildarkeppninnar, stigi fyrir ofan Benfica. Porto vann Águas Santas, 42:29, á heimavelli í gær. Þorsteinn Leó Gunnarsson hafði hægt um sig í leiknum. Hann skoraði eitt mark auk þess sem annað markskot hans missti marks. António Martinez, samherji Þorsteins Leós, var í miklum ham og skoraði 15 mörk úr jafn mörgum skotum.
